8 сакавіка – свята ці не свята? У наш час 8 сакавіка – гэта не проста дзень кветак і віншаванняў. У Беларусі гэты дзень набывае адмысловае значэнне, бо сёння сотні жанчын працягваюць змаганне, нягледзячы на рэпрэсіі, турэмныя катавальні і ціск з боку дзяржавы.
Ёсць розныя погляды на гісторыю святкавання 8 сакавіка. Як бы тое ні было, у нашым успрыманні дзень 8 сакавіка – гэта пра змаганне жанчын за права голасу, за годныя ўмовы працы і за роўныя магчымасці. У сённяшняй Беларусі жанчыны змагаюцца за права на волю думкі і слова, за права на справядлівы суд і за права жыць у вольнай краіне. Іх змаганне — гэта не толькі вулічныя пратэсты, але і супраціў у турэмных камерах, дзе яны сутыкаюцца з жорсткасцю, зневажаннямі і пазбаўленнем базавых праў.
8 сакавіка — дзень змагання
8 сакавіка — гэта не проста свята. Гэта дзень, калі мы ў чарговы раз нагадваем пра тых, хто працягвае змагацца за свае правы, нягледзячы на бесчалавечныя рэпрэсіі і пагрозы. Гэта дзень, калі мы кажам пра жанчын, якія знаходзяцца ў турмах, пра тых, хто падвяргаецца гвалту і дыскрымінацыі, пра тых, хто не баіцца ўзняць голас.
У Беларусі жанчыны сталі сімвалам супраціву. Яны працягваюць змагацца, нават калі іх пазбаўляюць волі. Іх змаганне — гэта не толькі змаганне за свае правы, але і змаганне за будучыню ўсёй краіны.
З 2020 года 1795 жанчын падпалі пад палітычны крымінальны пераслед. Па стане на снежань 2024 года беларускіх турмах знаходзілася 168 палітзняволеных жанчын, з якіх мінімум 19 мелі сур’ёзныя праблемы са здароўем. Яны сутыкаюцца з жудаснымі ўмовамі ўтрымання, катаваннямі, адсутнасцю патрэбнай медычнай дапамогі і сродкаў гігіены. Шмат хто з іх утрымваецца ў перапоўненых і халодных камерах, а за наймалыя парушэнні іх змяшчаюць у штрафныя ізалятары.
Такім чынам, дзень 8 сакавіка ў Беларусі набывае асаблівае значэнне, нагадваючы аб змаганні жанчын за свае правы і волю, якое працягваецца ва ўмовах рэпрэсій і палітычнага ціску.
Гэты інфармацыйны матэрыял створаны пры падтрымцы Belarus Beehive і Еўрапейскага Саюза.
